തിരുവനന്തപുരം മണമ്പൂർ വിഎച്ച്എസ് ആശുപത്രി വളപ്പിൽ ഗുണ്ട സംഘങ്ങൾ ഏറ്റുമുട്ടി. ഇവരെ പോലീസ് അറസ്റ്റ് ചെയ്തു. മണമ്പൂർ സ്വദേശികളായ സുജിത്ത്, വിശാഖ് വിപിൻ, കിരൺ, വക്കം സ്വദേശി മുഹമ്മദ് സുഹൈൽ എന്നിവരാണ് അറസ്റ്റിലായത്.
കഴിഞ്ഞ ദിവസം ഉച്ചയ്ക്ക് രണ്ടുമണിയോടെ ആയിരുന്നു സംഭവം. പരിക്കേറ്റ രണ്ടുപേരെ ചികിത്സയ്ക്കായി മണമ്പൂർ കുടുംബാരോഗ്യ കേന്ദ്രത്തിൽ എത്തിച്ചു. എന്നാൽ ഇവരെ പിന്തുടർന്നെത്തിയ എതിർസംഘം ആശുപത്രിയിൽ ചികിത്സയിൽ കഴിയുന്നവരെ ആക്രമിച്ചു. ഏറ്റുമുട്ടലിൽ ആശുപത്രി ഉപകരണങ്ങൾ തകർന്നതായി ആശുപത്രി അധികൃതർ അറിയിച്ചു. പോലീസ് സ്ഥലത്തെത്തിയപ്പോഴേക്കും അക്രമികൾ രക്ഷപ്പെട്ടു. തുടർന്ന് കല്ലമ്പലം എച്ച്എസ്ഒ വിജയരാഘവന്റെ നേതൃത്വത്തിലുള്ള അന്വേഷണസംഘമാണ് പ്രതികളെ പിടികൂടിയത്.പ്രതികളെ കോടതിയിൽ ഹാജരാക്കി റിമാൻ ചെയ്തു.
