ആറ്റിങ്ങൽ: നഗരസഭാ പരിധിയിൽ ചട്ടങ്ങൾ ലംഘിച്ച് പൊതുഇടങ്ങളിലും ജനവാസ മേഖലയിലും മാലിന്യം വലിച്ചെറിയുന്നതിന്റെയും കത്തിക്കുന്നതിന്റെയും ചിത്രങ്ങളടക്കം നഗരസഭക്ക് കൈമാറിയാൽ 2500 രൂപ പാരിതോഷിക തുകയായി ലഭിക്കും.
നിയമലംഘനം കണ്ടെത്തിയാൽ ആരോഗ്യവിഭാഗത്തിന്റെ 8089081316 എന്ന വാട്സാപ്പ് നമ്പറിൽ നിങ്ങൾ ചിത്രീകരിച്ച ദൃശ്യങ്ങൾ അയക്കാം. ചിത്രങ്ങൾ അയക്കുന്നവരുടെ പേരുവിവരങ്ങൾ സുരക്ഷിതമായിരിക്കുമെന്നും അധികൃതർ ഉറപ്പുനൽകുന്നു. വാട്സാപ്പ് നമ്പറിന്റെ പ്രദർശനവും പാരിതോഷിക തുകയുടെ പ്രഖ്യാപനവും ചെയർപേഴ്സൺ അഡ്വ.എസ്.കുമാരി നിർവഹിച്ചു.
നഗരസഭാങ്കണത്തിൽ നടന്ന പരിപാടിയിൽ വൈസ് ചെയർമാൻ ജി.തുളസീധരൻപിള്ള, സ്ഥിരംസമിതി അദ്ധ്യക്ഷന്മാരായ അവനവഞ്ചേരി രാജു, എസ്.ഷീജ, സെക്രട്ടറി കെ.എസ്.അരുൺ, ഹെൽത്ത് സൂപ്പർവൈസർ റാംകുമാർ, കൗൺസിലർമാർ, ആരോഗ്യ വിഭാഗം ഉദ്യോഗസ്ഥർ, ജീവനക്കാർ തുടങ്ങിയവർ പങ്കെടുത്തു.
