ഷാഫിക്കെതിരെ സൈബര്‍ സഖാക്കളുടെ നേതൃത്വത്തില്‍ വിദ്വേഷ പ്രചാരണം നടന്നു

തിരുവനന്തപുരം: വടകരയിലെ യുഡിഎഫ് സ്ഥാനാര്‍ഥി ഷാഫി പറമ്പിലിനെതിരേ സിപിഎം വിദ്വേഷപ്രചരണം നടത്തിയെന്ന് കെപിസിസി ആക്ടിംഗ് പ്രസിഡന്റ് എം.എം ഹസന്‍. വ്യാജ വീഡിയോ ഇറക്കി ദുഷ്പ്രചാരണം നടത്തി. മണ്ഡലത്തില്‍ വര്‍ഗീയ വിദ്വേഷം ആളിക്കത്തിക്കാനാണ് സിപിഎം ശ്രമിച്ചതെന്നും കെപിസിസി വര്‍ഗീയ പ്രചാരണത്തിനെതിരെ പ്രചാരണം തുടങ്ങുമെന്നും കോണ്‍ഗ്രസ് വ്യക്തമാക്കി.. സിപിഎമ്മിന്റെ വിദ്വേഷ പ്രചാരണം തടയാന്‍ ഈ മാസം 11 ന് വടകരയില്‍ കൂട്ടായ്മ സംഘടിപ്പിക്കുമെന്നും എംഎം ഹസന്‍ അറിയിച്ചു. തെരഞ്ഞെടുപ്പ് അവലോകന യോഗത്തിന് പിന്നാലെയാണ് പ്രതികരണം. അതേസമയം ലോക്‌സഭാ തെരഞ്ഞെടുപ്പില്‍ 20 സീറ്റുകളിലും യു.ഡി.എഫ് വിജയിക്കും. തെരഞ്ഞെടുപ്പ് കമ്മീഷന്റെ ഭാഗത്തുനിന്ന് വീഴ്ചയുണ്ടായി. തെരഞ്ഞെടുപ്പ് ഉദ്യോഗസ്ഥരില്‍ ഭൂരിഭാഗവും മാര്‍ക്‌സിസ്റ്റ് അനുഭാവികള്‍ ആയിരുന്നു. വീഴ്ച വരുത്തിയ ഉദ്യോഗസ്ഥര്‍ക്കെതിരെ തെരഞ്ഞെടുപ്പ് കമ്മീഷന്‍ അന്വേഷണം നടത്തണമെന്നും ഹസന്‍ ചൂണ്ടിക്കാട്ടി.